وفي دبي
وفي بيت بو مايد
قوم بو مايد توهم واصلين من العين .. وكل واحد منهم سار حجرته ... ميره اربعت عن سلامه اختها
ميره : ها .. شو سويتو تعالي قوليلي شو الملجه ... وهنووده كيف طالعه حلوه .. وريمووه شو لابسه
سلامه : خيبه .. خيبه .. خيبه ... تبيني اقولج كل هذا يوم انتي هالكثر بالج هناك جان ييتي الكل كان يسال عنج
ميره : والله سالو عني .. منو اللي سال عني
سلامه : كلهم .. ريمووه .. هنود .. عمووه .. حتى اليازيه اخت هزاع
ميره : وع .. وع ..وع هاي الا ما ادانيها شايفه عمرها
سلامه : حرام ليش حليلها
ميره : حليلها انتي اتقولين حليلها .. ليش ما تدرين انها محيره حق راشد
سلامه : عادي شو يعني اذا هو يباها الله يوفقهم
ميره : لا انتي مب صاحيه .. اتحبين واحد واتقولين الله يوفقه مع غيرج
سلامه : انا احبه هيه بس اذا هو ما يباني انا شو اسويبه
ميره : والله انج انسانه غريبه
سلامه : لا غريبه ولا شي وتدرين انا مراات احس اني ما احبه احس انها سوالف مراهقه وبس
ميره : شووو ... مراهقه
سلامه : هيه .. صدقيني مشاعر الوحده في هالعمر ما هي الا مراهقه .. تدرين انا من فتره قمت احس بشعور عادي تجاهه مب شرات قبل صح اني اتخبل عليه .. بس ما عاد يهمني شراات قبل
ميره : ............
سلامه : والحين ممكن اتخليني ابا ابدل ثيابي وارقد لاني تعبانه وباجر انشا الله بقولج عن كل شي .. اوكي
ميره : اوكي
وظهرت عنها وسارت حجرتها وهي اتفكر برمست اختها معقوله اتكون مشاعرها هي تجاه منصور مشاعر مراهقه
ميره : لا .. لا .. مستحيل انا احب منصور وهو يحبني ..... اااااخ .. يحبني ... يحبني وهو من شهرين مبند تيلفونه وما اعرف عنه شي ..ااااااخ .. يا خوفي انه كان يقص عليه ويوم مل مني بند هالتيلفون ( وتمت اجرب تتصل له .. بس بعد كان مسكر تيلفونه )
اليوم الثاني
وفي بيت بو حمد
شما وكالعاده يالسه روحها في البيت .. ويوم ملت من اليلسه سارت صوب يدتها
عفرا : مرحبا ببنتي
شما ( واتحب يدتها عراسها وتيلس عدالها ) مرحبابج زود ... شووو بعد انتي شرااتي يالسه روحج
عفرا : شوو نسوي محد ينفع هالزمان لا لعيال ولا عيالهم بعد
شما : افااا يدتي نحن ما ننفع
عفرا : وانا منو مبرد جبدي غيرج انتي لا خليت منج
وفي هاللحظه نزل سهيل
شما : اففففففف ... هذا هنيه بعد ( وتمت تعدل شيلتها )
سهيل : ( واونه يبا يعدل العلاقه ويا شما ) يا مرحبا والله ببنت العم يايتنا اليوم ما شا الله
شما : يايه ليدتي مب الكم
سهيل : افاااا اليوم بنت العم مب راضيه علينا
شما : ( واطالعته بطرف عينها ) دوووم اصلا
سهيل : يدتي انا ابا حليب ما عندكم حليب
عفرا : هذي الدله موطايه ... شما فديتج صبي حق ولد عمج
شما ( ومن دوون نفس ) : انشا الله يدتي
سهيل : ( تم يضحك على شكل شما وهي لايعه جبدها منه )
شما : ها ..يود
سهيل : مشكووووره يا بنت العم يطولنا بعمرج ( وتم يشرب الحليب ) ...الحليب وايد حلو اليوم
عفرا : اكيييد مزيده الشكر هالسباله انا عييت عنها لي ما تسمع الرمسه
سهيل ( تم يضحك هو كان يقصد ان شما اللي صابتنه مب طعمه )
شما ( لايعه جبدها من سهيل ومن سخافاته وخصوصا عقب السالفه الاخيره اللي استوتلها وياااه ) : يدتي انا اترخص الحين عنج
عفرا : ياااااله ما يلستي توج يايه
شما : لا يدتي ذكرت ان عندي واجب بسير احله .. تدريين باجر مدرسه
عفرا : برااايج .... تعالي الا امج وين
شما : سايره الجمعيه تشرا اغراض حق البيت
عفرا : هيه
شما : يلا مع السلامه
عفرا : الله يحفظج
ظهرت شما من بيت عمها ولن بسهيل ظاهر وراها
سهيل :شما
شما ( سوت عمرها ما تسمعه ومشت عنه )
سهيل : شما
شما : خير
سهيل : انتي زعلانه مني
شما : ولا هميتني اصلا
سهيل : بلاج مب معبرتني
شما : لاني ما اسوي سالفه حق ناس شراتك
سهيل : شو تقصدين بهالرمسه
شما : ما ادلك اذكر رمسك وخلاف تعال ارمس
سهيل : شما انا ما قلت شي بس انا كنت محرج
شما : واللي يحرج يرمس بهالرمسه ... اصلا لو انت ريال بتستحي اترمس بنت عمك اللي رابيه جدامك بهالرمسه .. بس للاسف طحت من عيني
سهيل : شما ..
شما ( مشت عنه ولا سوتله سالفه وردت بيتهم )
وفي بيت بو عبد الله
ريم توها نازله تحت .. وكان راشد يرمس ابوه من يتهم اسكتو
ريم : صباح الخير
الكل :صباح النور
ريم : اوووه منو يالسه اشوف جدامي راشد بن سعيد ناش من وقت
راشد : جيييه مب عايبنج
ريم : لا عايبني .. انشا الله دووم
راشد : ها ابويه خلاص عيل ارد عالريال
بو عبد الله : هيه قولهم اني اترياهم اليوم عقب المغرب
راشد : انشا الله
ريم : شو السالفه .. منو هالريال
راشد : وانتي شلج
ريم : اففففف ... انزين وين امايه
بو عبد الله : في المطبخ هي واختج
ريم : حشى شو يسون في المطبخ من صباح الله خير
راشد : عالاقل احسن منج اللي ما منج فايده
ريم :ابويه شوفه
راشد : ( ويقلد صوتها ) ابويه شوفه
ريم : سخيف
راشد : طالع عليج
ويرن تيلفون البيت ... اربعت ريم وردت عليه
ريم : هلا والله
شما : اهلين ... شو هالكسل لين الحين ارقاد .. عنبوه انا من متى اتصل لج
ريم : اونه محد قالي ... يا بنت الحلال مب ساد باجر بنسرح المدرسه .. خليني ارقد
شما : شو هالحشره عدالج
ريم : هذا رشوود يرمس ابويه
شما : ( صخت من سمعت اسم راشد )
راشد : اييه انتي اصغر عيالج رشوود ويا هالويه بعدين شله تطريني ومنو هاي اللي طارتني جدامها
ريم : هاي شموه اتقول شو هالحشره اللي عدالج .. قلتلها هذا رشوود
راشد : ( وفي خاطره ) فديت هالطاري
شما : ريمووه يالسباله اشله اتقولين شمووه جدام اخوج قولي اربيعتي وخلاص
ريم : يا هي بلشه الا هو ليش اتقولين رشوود وانتي ليش اتقولين شمووه انا ابتلشت اتراني ... اقولج شي انا بسير فوق بتصل لج من تيلفوني .. اوكي
شما : ايكون احسن
وبندت عنها واربعت ريم فوق عشان اترد تتصل الها وراشد ظهر من البيت